“Fənərbağça” ilə keçirilən yoldaşlıq görüşündən sonra “Qalatasaray”ın prezidenti Adnan Polatın açıqlaması “cim-bom” azarkeşlərini xeyli həyəcanlandırıb. Belə ki, Polat bir ulduz futbolçu alınacağını gizlətməyib: “Bu komandaya bir maestro, yəni pleymeyker lazımdır”. Polatın bu sözlərindən sonra rəhbərliyin diqqəti “Yuventus”un braziliyalı yarımmüdafiəçisi Dieqoya yönəlib. “Sarı-qırmızılılar” indi Dieqonun transferini həyata keçirmək üçün sponsor axtarışındadırlar. “Yuventus”un baş məşqçisi Qiqi del Neri də Dieqonun onun oyun üslubuna uyğun gəlmədiyini və bu səbəbdən də yarımmüdafiəçinin transferə çıxarıldığını açıqlayıb. Bu isə “Qalatasaray” üçün göydəndüşmə olub. “Qoca sinyora”nın Elano Blumerlə də maraqlanmasından yararlanmaq istəyən türklər qarşı tərəfə həm Elanonu, həm də müəyyən məbləğdə pul təklif edəcəklər.

“Verder” və “Nyukasl”ın da transfer etmək istədiyi “Marsel”in istedadlı futbolçusu Hatem Ben Arfa ilə “Qalatasaray” da yaxından maraqlanır. Fransa klubuna göndərilən yazıda yarımmüdafiəçi Ben Arfanı transfer etmək istədiyini qeyd edən “Qalatasaray”ın təklifi maliyyə problemi ilə üzləşən “Marsel”ə cəlbedici gəlib. İndi son sözü futbolçu özü deyəcək.  Bu haqda xəbər verən RMC radiosu son sözün gənc futbolçuda olduğunu və Ben Arfanın qısa bir vaxt ərzində qərar verəcəyini bildirib.

“Qalatasaray”da transfer işləri ilə məşğul olan Adnan Sezgin səfərin birini başa çatdırıb, digərinə başlayır. Yarımmüdafiəni gücləndirmək istəyən “cim-bom”da ön plana çıxan “Anderlext”li Yan Polak və “Nansi”li Landri N'Quemodur. Sezgin Polakı “Anderlext”in hazırlıq oyunlarında izləyib. çexiyalı futbolçu həmyerlisi Milan Baroş amilinin də təsiri ilə “Qalatasaray”a gəlməyin əleyhinə deyil. Polak mübariz olmaqla yanaşı, yüksək təxnikaya da malikdir. Sezgin Belçika təmsilçiləri ilə danışıqları davam etdirir.

Landri N'Quemo üçün klubu “Nansi” 5 milyon avro istəyir. Adnan Sezgin bu qiyməti 3 milyon avroya salmağa çalışır. Kamerunlu futbolçu böyük hədəfi olan bir klubda oynamaq istədiyini bildirib və “Qalatasaray”a “yaşıl işıq” yandırıb. Baş məşqçi Frank Raykard daha çox Polakın alınmasını istəsə də, rəhbərlik hansı oyunçunun qiymətini aşağı sala bilsə, onu da transfer edəcək.

Bu arada, Hollandiyadakı təlim-məşq toplanışını yekunlaşdıran “Qalatasaray” vətənə qayıdıb. Əvvəlcə Almaniyanın Düsseldorf, oradan isə İstanbula gələn düşərgədən heç kim mətbuata açıqlama verməyib. “Cim-bom” Avropa Liqasının üçüncü təsnifat mərhələsi çərçivəsində iyulun 29-da Serbiyanın “OFK Belqrad” klubuna qarşı keçirəcəyi oyunun hazırlığına bu gündən başlayacaq. Əlavə edək ki, Hollandiyadakı hazırlıq dönəmində 4 yoldaşlıq görüşü keçirən “Qalatasaray” Almaniyanın 5-ci liqa təmsilçisi “Kleve”ni 4:0, “Homberq”i 5:0, İranın yüksək liqa klubu PAS-ı 4:0 və Belçikanın 4-cü liqa komandası “Hasselt”i 2:0 hesabı ilə məğlubiyyətə uğradıb. “Aslan” Almaniyada üz-üzə gəldiyi əzəli rəqib “Fənərbağça”ya isə məğlub (0:1) olub.