ölkəmizin iddialı klublarından olan “Xəzər Lənkəran”ın Avropa Liqasındakı uğursuz çıxışından sonra komandanın baş məşqçisi Ağasəlim Mircavadov istefa vermişdi. Boş qalmış postun yeni sahibi isə dünən bəlli oldu. Bu, rumıniyalı mütəxəssis Mirça Rednikdir. Rumıniyadan başqa, Belçika vətəndaşlığını da daşıyan mütəxəssis qarşıdakı iki il ərzində Lənkəran təmsilçisinə rəhbərlik edəcək. Dünən Türkiyənin İstanbul şəhərində Mübariz Mənsimovla görüşən rumıniyalı məşqçi ilə rəsmi razılıq əldə edilib. Rumıniya mətbuatının verdiyi məlumata görə, Rednik “Xəzər Lənkəran”dakı fəaliyyətinə görə bir ildə 500 min avro qazanacaq. 1962-ci il aprelin 9-da Rumıniyanın Hunedoara şəhərində anandan olan mütəxəssis futbolçu kimi “Kornivul”, “Dinamo”, “Rapid” (hamısı Rumıniya), “Bursaspor” (Türkiyə), “Sent-Truyden”, “Standard” (hər ikisi Belçika) klublarının formasını geyinib. Müdafiəçi 1981-1991-ci illər ərzində Rumıniya milli komandasının şərəfini qoruyub. Mirça milli forma ilə meydançaya çıxdığı 83 oyunda rəqib qapılarından iki top keçirib. Mirça Rednik baş məşqçi kimi ölkəsinin “Rapid” klubunda debüt edib. Bunun ardınca rumın mütəxəssis müxtəlif illərdə “Bakeu”, “Vasluy”, “Universitatya”, “Dinamo” (hamısı Rumıniya) və “Əl-Nəsr” (Səudiyyə Ərəbistanı) klublarında işəlyib. Mirçanın sonuncu iş yeri isə Rusiyanın “Alaniya” klubu olub.