 | Azərbaycana sırıdığımız “azərbaycanlı” | | Anar Xanlarov |
|  Bu haqda yazını çoxdan yazmaq istəyirdim. Yəqin ki, tez-tez bizim idman saytlarında, bəzi qəzetlərdə bu başlıqlı xəbərlərə rast gəlirsiniz: “Azərbaycanlı futbolçu zədələndi”, “Azərbaycanlı futbolçu Avropa klublarının maraq dairəsində”, “Qalatasaray” azərbaycanlı futbolçunu buraxmaq istəmir” və s. Bəs həmin xəbərlərdə azərbaycanlı kimi təqdim olunan bu şəxs kimdir? “Qalatasaray”ın və Türkiyə millisinin müdafiəçisi Sərvət çətin. Nə zaman Azərbaycanda anadan olub, hansı rayonumuzda doğulub, “metirkasında” hansı doğum evimizin nömrəsi yazılıb, bunu bilmirəm. Yalnız onu bilirəm ki, bəziləri onu azərbaycanlı kimi “sırıyır” Azərbaycan xalqına. Burada yaxşı bir el məsəli çəkərdim, amma qəzet səhifəsi olduğundan, yeri deyil. Kimdir bu Sərvət çətin? 1981-ci il mart ayının 17-də Türkiyənin İğdır şəhərində anadan olan təmiz Türkiyə vətəndaşı. 1998-ci ildə peşəkar karyerasına “Kartalspor”da başlayıb və geridə qalan 12 il ərzində “Göztəpə”, “Dənizlispor”, “Fənərbağça”, “Sivasspor” klublarının şərəfini qoruyub, hazırda da “Qalatasaray”ın futbolçusudur. 1998-ci ildə ilk dəfə Türkiyə U-17-nə dəvət olunub və 2 oyunda forma geyinib. Sonradan isə ardıcıl olaraq U-18, U-21, Türkiyə B millisi və nəhayət, Türkiyə A milli komandasına gəlib çıxıb. Gördüyünüz kimi, futbolçu karyerasında Azərbaycanla heç bir bağlılığı yoxdur. üstəlik, Sərvət ömründə bir dəfə də olsun, Azərbaycanda olmayıb. Hər kəsin fikrinə hörmətlə yanaşıram və bu xəbərləri yayan insanların çoxu ilə şəxsən tanışlığım var. Hətta bəziləri ilə daha yaxşı münasibətim var. Amma bu məsələdə onların heç birinə haqq vermirəm. Bu insan Türkiyədə doğulub, orada böyüyüb boya-başa çatıb, futbolçu karyerası bütünlüklə bu ölkəyə bağlıdır, atası da, anası da türkiyəlidir. Az öncə qeyd etdiyim kimi, 30-a yaxın yaşı olsa da, bir dəfə də olsun Azərbaycanda olmayıb. Bütün bunların fonunda niyə onu zorla özümüzünküləşdirməyə çalışırıq? Sərvət bu gün “Qalatasaray” kimi klubun formasını geyinib, Türkiyə millisində çıxış edirsə və Avropa klublarının diqqət mərkəzinə düşürsə, bu, Türkiyənin, Türkiyə futbolunun uğuru sayılır, Azərbaycanın yox. Nə vaxta qədər özümüz futbolçu yetişdirməyə-yetişdirməyə başqasının uğuruna sevinəcəyik, onu halal malımız kimi öz adımıza yazacağıq? Nə var, nə var, çətinin ulu babası nə vaxtsa Türkiyənin Azərbaycana yaxın ərazisindən köç edib. Heç o vaxt Sərvətin izi-tozu da yox idi. Yəni məni düzgün başa düşün, Sərvətin köklərində Azərbaycanla bağlı bağın tapılması çox yaxşıdır. Bunu bir dəfə demək olar, iki dəfə demək olar, amma hər addımbaşı, yeri gəldi-gəlmədi, onu “azərbaycanlı futbolçu” adı altında camaata sırımaq lazım deyil. Əgər çətin özünü azərbaycanlı saysaydı, ən azı keçmişinə, köklərinə hörmət etsəydi, 29 illik ömründə heç olmasa bir dəfə də olsun Azərbaycana gəlib ayaqüstü də olsa, tarixi vətəninə baş çəkərdi. özü də İstanbuldan Bakıya təyyarə ilə maksimum 2 saatlıq yoldur. Elə istirahət günlərinin birində səhər gəlib, axşam da qayıtmaq mümkündür. Əgər Sərvət bunu etməyibsə, deməli, özünü ürəkdən azərbaycanlı saymır.
 
Bu xəbər 267 dəfə oxunub. |
|
|
|
